မေးခွန်း ၂။ ကုမ္ပဏီအတွင်းနဲ့ အလုပ်ခွင်က ပတ်ဝန်းကျင်ရဲ့ အခြေအနေဘယ်လိုရှိပါသလဲ။

ကျွန်တော်တို့ အလုပ်ခွင်မှာ နိုင်ငံသားအမျိုးမျိုး၊ အသက်အရွယ်၊ လိင်၊ အလုပ်တာဝန် မတူကြပေမယ့်၊ တစ်ဦးနဲ့တစ်ဦး ပေါင်းသင်းဆက်ဆံမှုက ကောင်းပြီး မိသားစုလို ပူးပေါင်းမှုရှိပါတယ်။ အထူးသဖြင့် စီနီယာတွေကကြင်ကြင်နာနာနဲ့ နားလည်မှုပေးပြီး မသိတာ၊ မရှင်းတာတွေရှိရင် ဒါမှမဟုတ် အခက်အခဲဖြစ်လာတဲ့အခါမှာ ပြောစရာမလိုပဲ သေသေချာချာ အကူအညီပေးတတ်ကြပါတယ်။

အဲ့ဒီလို ပတ်ဝန်းကျင်ကောင်းတစ်ခုအတွင်းမှာ၊ ကျွန်တော်ဟာ ကိုယ်တိုင်ရဲ့ ကျွမ်းကျင်မှုတိုးတက်ရေးကို ရည်ရွယ်ပြီး၊ တဖြည်းဖြည်းချင်းနဲ့ တစ်ဆင့်ပြီးတစ်ဆင့် အသစ်အသစ်သော အလုပ်တာဝန်တွေကို စတင်လေ့လာလုပ်ကိုင်ခွင့် ရပါတယ်။ ယခုအချိန်မှာတော့ ယာဉ်စစ်ဆေးခြင်းလုပ်ငန်းတွေနဲ့ ခက်ခဲတဲ့ ပြုပြင်ထိန်းသိမ်းမှုလုပ်ငန်းတွေကိုပါ တာဝန်ယူခွင့်ရလာပြီဖြစ်လို့ အလုပ်အတွေ့အကြုံတွေ ပိုမိုရရှိလာခဲ့ပါတယ်။

အခုတလောမှာတော့ ပြုပြင်ထိန်းသိမ်းရေးရလဒ်ရှင်းပြမှုတွေကို ဧည့်သည်တွေကို တိုက်ရိုက်ရှင်းလင်းပြပေးရတဲ့ အခွင့်အလမ်းတွေ ပိုများလာတာမို့ ဧည့်သည်တွေဆီကနေ ကျေးဇူးတင်စကားနဲ့ ချီးမွမ်းတဲ့ အသိအမှတ်ပြုစကားတွေ ကို တိုက်ရိုက်ကြားခွင့်ရလာလို့ အရမ်းပျော်ပါတယ်။ ဒါ့အပြင် ကျွန်တော့်ကို ဂရုစိုက်ပြီး အားပေးအားမြှောက် ပြုပေးတဲ့ စီနီယာတွေနဲ့ မန်နေဂျာတွေရှိနေတာကြောင့် အလုပ်ခွင်မှာလည်း စိတ်လှုပ်ရှားမှုအပြည့်နဲ့ ပျော်ပျော်ရွှင်ရွှင် အလုပ်လုပ်နိုင်နေပါတယ်။

မေးခွန်း ၃။ Nissan Osaka ကို ရွေးချယ်ခဲ့တာ မှန်ကန်တယ်လို့ တွေးမိတဲ့အရာက

ကုမ္ပဏီကိုဝင်ပြီးကာစ အလုပ်သင်ကာလမှာ နိုင်ငံခြားသားကျောင်းသားတွေအတွက် အထူးလေ့ကျင့်သင်ကြားမှုတွေ စီစဥ်ပေးတာကို တွေ့ရတော့ အလွန်ပဲ အံ့အားသင့်ရပါတယ်။ လူနည်းနည်းချင်းခွဲပြီး သေသေချာချာအချိန်ယူပြီးတော့ မသိနားမလည်တဲ့စကားလုံးတွေကိုလည်း စိတ်ရှည်ရှည်နဲ့သေသေချာချာရှင်းပြပေးတဲ့အတွက် စိုးရိမ်စရာမရှိဘဲ သင်ယူနိုင်ခဲ့ပါတယ်။ ဆိုင်ခွဲရောက်ပြီးနောက်ပိုင်းမှာလည်း ပုံမှန်အုပ်စုလိုက်လေ့ကျင့်သင်ကြားမှုတွေ ရှိနေတာကြောင့် အဆက်မပြတ် ကျွမ်းကျင်မှုတိုးတက်နိုင်တဲ့ ပတ်ဝန်းကျင်လည်း ရှိပါတယ်။

ပြီးတော့ သိပ်မကြာခင်ကပဲ ကျွန်တော်က လက်ထပ်ခဲ့တဲ့အတွက် အမျိုးသမီးကို မြန်မာကနေ ဂျပန်ကိုခေါ်ယူဖို့ အတွက် လိုအပ်တဲ့ စာရွက်စာတမ်းတွေ လျှောက်ထားခြင်း၊ ဆောင်ရွက်ခြင်း၊ အိမ်လခတစ်စိတ်တစ်ပိုင်း ထောက်ပံ့ခြင်း စတဲ့ စနစ်တွေကိုလည်း အသေးစိတ်ရှင်းလင်းသင်ကြားပေးခဲ့ပါတယ်။
အနီးအနားမှာလည်း အကြံဥာဏ်တောင်းနိုင်တဲ့၊ ဆွေးနွေးတိုင်ပင်ရလွယ်ကူတဲ့ ပံပိုးမှုတွေ ရှိနေတဲ့အတွက် အခုတော့ မိသားစုနဲ့တူတူ ဂျပန်နိုင်ငံမှာ စိတ်အေးလက်အေး နေထိုင်နိုင်နေတာမို့ ကျေးဇူးတင်ရပါတယ်။